倪晨曦爆Bosco花弗：對個個都好

昨日倪晨曦、模特兒鍾浠文、無綫藝人黃浩然及黎諾懿一同出席護膚品活動，其中Elva被問到與Bosco的緋聞？她例牌否認說：「佢冇追我，我都冇鍾意佢，大家依家都冇聯絡，亦冇見面。（覺得佢個人點？）佢好nice好好人，對所有人都好好，（花弗？）呢樣嘢就唔知，我同佢普通熟，可能佢形象畀人感覺花弗啩。（知佢同胡杏兒分手？）知，我未見過杏兒。」

Elva表示擇偶絕不容許花心男，話雖如此，昨日卻有報道指她與苟芸慧及韓模蔡恩真齊跟楊受成兒子出海玩樂，更謂三人喜歡「覓食」？Elva自言報道令她不開心，她說：「寫得好衰，我識咗Alex（楊受成兒子）好耐，大家平時都會一齊玩，而苟芸慧嗰陣喺多倫多已經識，蔡恩真喺香港做嘢識，但都好friend，嗰日咁啱大家約埋一齊出嚟玩，（一齊溝仔？）唔係，成班人全部係好朋友。」她指報道刊登後，亦有與Alex聯絡，對方更安慰她日後出外玩小心一點，免人家對她有此印象！

而同場的黃浩然被問到近日不少小生與內地女演員傳緋聞？他指自己甚少到內地工作，若北上就會請教鄭嘉穎，他笑說：「同佢取吓經囉，佢話自己冇人吼嘛，（你信呀？）佢講咪信囉！」

另外，有指黃宗澤買巨額保險加入胡杏兒為受益人，又傳出杏兒與台星黃少祺撻着，昨杏兒在微博還擊，寫着：「這些很明顯是劇照，在那流出來大家應該很清楚，夠了，真的夠了，不要再每天一個版本，不要再不停的傷害，我不說不代表我是啞巴，但我真的希望，放過我們吧！好嗎？」

文：名人組