昔日東方袁詠儀師奶上身斬叉燒
chilam單拖型遊
靚太袁詠儀日前於跑馬地斬叉燒，健康至上的她大嗌：「唔要咁肥！」老闆識做地送多幾舊，更大讚自己的叉燒和靚靚一樣咁靚，氹到她四萬咁口。
袁詠儀和張智霖兩夫婦最近不時有影皆雙，齊齊弄兒為樂之外，靚靚更全權負責起照顧全家人的飲食重任，為了兒子健康成長，平時餐單以營養和健康至上的她，日前未知是否太忙，突然出現在跑馬地斬叉燒加餸。
當晚6點半左右，靚靚駕駛老公名下落地不久的靚車，由銅鑼灣入跑馬地，特登前往幫襯燒味名店。全身包到實的她，穿上一對平底鞋，將車輛停正在店門口，然後馬上跳落車衝入店內，師奶仔上身左揀右揀一陣後，向老闆大嗌：「半斤叉燒，唔要咁肥！」
急急回家煮飯
老闆見有明星幫襯，心情大靚，仍不忘賣花讚花香，直言自己的叉燒和靚靚一樣咁靚，順勢更斬多幾舊相贈，氹到靚靚四萬咁口。期間有食客認出靚靚，不時向她眼望望，但靚靚未有介意，取過叉燒後急急腳上車趕回家和老公及愛兒魔童開飯食靚叉燒。
有賢內助打理家裏事務，難怪張智霖（chilam）可以完全無後顧之憂地忙於工作。早前的一個晚上，張智霖被發現單拖出現在銅鑼灣，一身型仔打扮的他，和朋友茶敍後，急步往取車趕回家見妻兒。
文、攝：追蹤組
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
