日台新奇滋味

當香港正值禁晚市，又因各種原因掃罐頭和即食麵等作儲糧，日本和台灣的餐廳和品牌，就依然風雨無阻地推出新品，無論是叮叮麵、包點、薄餅或飲品等都有新設計和配搭，造型搶眼之餘，味道又令人驚喜，無得飛都不妨望梅止渴一下。

冷麵冰叮完唔溶

疫情期間，屋企擺放了很多即食麵或米飯，貪其可以直接放入微波爐一叮就食得。日本有急凍食品及加工品牌公布將於3月1日起推出一款新即食冷麵，將自家製麵條、肉條、蛋絲、秋葵和薑絲分門別類擺放，加入冰塊後放入微波爐叮，拿出來時冰塊竟然未溶，將麵條加冰塊混合，就變成清涼的冷麵，相當神奇。進食時配用黑醋、蘋果醋和穀物醋混合的醬汁和配料拌勻，微酸開胃。

網址：https://bit.ly/33FEzPN

芝士撻大變身

日本人諗頭多多，經常跨品牌合作推出新品，早前就有芝士撻專門店和乳製品公司聯乘，推出杯裝芝士撻雪糕和飲料。雪糕以北海道忌廉芝士製作，入口有芝士慕絲、曲奇碎的口感；而飲品則用芝士粉加北海道芝士混合，有點似撻皮的味道，味道獨特，芝士撻迷又點可以錯過呢？

網址：https://bit.ly/3LJQZXU

甜版小籠包

皮薄多汁的小籠包，絕大多數都是鹹食，餡料多是豬肉，更會隨時令加入各種食材如蟹粉、松露等。台灣有間以小籠包聞名的餐廳，其日本分店早前就推出限定的士多啤梨和朱古力的甜版小籠包。前者選用日本士多啤梨配豆沙作餡，後者則用上法國朱古力製成，是不錯的飯後甜品。另外，還有期間限定的羅勒小籠包供應，熱辣辣食，芬芳撲鼻。

網址：https://bit.ly/3sWCMhU

蚵仔煎變薄餅

台灣街頭小食多籮籮，蚵仔煎就有不少捧場客，當地早前有薄餅店就以此作靈感，設計出全新限定的「蝦猴酥蚵仔比薩煎」，餡料有嘉義東石鮮蚵、蛋絲、小白菜，再鋪滿炸脆的蝦猴酥（原隻連殼炸蝦），唧上惹味的甜辣醬，口感十足。有網民搶試後指蝦猴酥啖啖香脆，夠晒惹味。

網址：https://bit.ly/3p5ome0

撰文：林佩婷