室內Roller場再現集體回憶返晒嚟

大家有聽過賓仕嗎？如果你聽過，甚至去過，代表你唔覺意自爆年齢了。賓仕（Buns）是80年代盛極一時的室內滾軸溜冰場，設在當時沙田新城市廣場底層地庫。當年場內融入熱鬧的Disco燈光和音樂元素，加上24小時營業，深得年輕人歡心。暌違30多年，香港人終於再有室內Roller場，就是位於鰂魚涌柯達大廈內、佔地約1.8萬平方呎、全新開幕的Bun's 2020。這多得幾位在那些年踩着Roller開心成長的股東，簡銘進和James便是其中兩位。

相信大家和筆者一樣好奇，是甚麼原因令賓仕回歸吧？簡單來說，一切由簡銘進於去年底和女兒到維園踩Roller開始，由於經常在社交平台出Post分享相片，所以吸引了一大班朋友讚好和留言，更喚起大家那些年「在賓仕踩Roller」的集體回憶。簡銘進表示：「短短2個月左右便聚集了好幾個舊朋友（現在的股東們），大家講起以前踩Roller都好開心。80年代嘅香港人冇乜煩嘢冇乜怨氣，感覺好好。當時冇咁多機會搭飛機去旅行，冇咁多電子產品又冇咁多機打，年輕人嘅娛樂都係踢波、游水、踩單車和踩Roller之類，不過一樣咁好玩。」

他續說：「大家聊起踩Roller時，都有滿滿的開心回憶，好似其中一位股東朋友就說：『當年我哋有咩運動可以合法地拖手仔呢？咪就係Roller囉！你唔識呀，我拖住你吖！』另外，當年的Roller場有拖手時段和拉龍時段，即使唔拖手都會扶住，以前最開心就係咁。大家講完對望都忍不住說：『拖咩吖，全部自己啲仔女喺晒度，拖自己啲仔女啦！』因為依家拖住自己個女去踩Roller是最開心的。就這樣，大家傾傾吓就想開番個室內Roller場，一來想帶回那種昔日香港情懷，二來想畀小朋友知，踩Roller是一種好開心又可放電的活動，我們以前就是這樣踩Roller長大的。縱使不少人質疑今時今日仲有冇人會踩，但我們沒想太多，只是想有個舒適地方開心放電，齊齊輕鬆吓！」

另一創辦人James提起踩Roller，亦滿臉笑意：「之前成班老朋友帶埋自己小朋友一齊踩Roller，簡銘進仲帶埋喇叭去維園播歌，真的很開心！期間我們還認識到不少喜愛踩Roller的年輕人，包括香港花式滾軸溜冰運動員蔡穎怡（Katherine）和她的學生，才知道他們一直以來未踩過室內Roller場。所以趁Bun's 2020正式開幕，就邀請她來練習和開班，將新場地作訓練中心。雖然規模上不及當年賓仕大，但也拍得住當年太古城（另一著名Roller場所在地），一如賓仕當年在主場鋪木地板，副場就暫時跟街場一樣用自流平地台（遲下有機會轉埋木地板），既是室內，又有冷氣、燈光和音響設備，唔怕好天曬，落雨冇得練，洗手間又近。」

講到個場，James直言：「其實開一個式微咗30幾年的Roller場，是冒險和充滿好多問號的。因為我們的集體回憶是踩雙排Roller，所以由構思到訂製不同尺碼的Roller鞋，都是以雙排Roller行先，有些Roller鞋的4個轆還會發光。」他強調：「我們也不想設限，不過要在場內同時玩雙排及單排滾軸溜冰，需要一些時間安排。」James又開心指：「開幕當日，我認識了一班後生仔女，他們在場內隨着音樂跳Roller Dance，好有節奏，像在Disco跳舞般。他們更着上喇叭褲、背心，戴埋頭巾，以一身80年代裝束示人，成班人跳得好開心；打破了以往一般人對踩Roller只有前溜和後溜的認知，勁過我哋後生嗰陣啦！」

上世紀80年代初，一股Roller熱由美國吹到香港，有冷氣兼有Disco閃燈和勁歌的室內Roller場開完一間又一間，遍布港九新界。講到3大名場，當然不可不提「沙田賓仕」（即賓仕娛樂中心）和另外兩間由世界體育會開設的「德福世界」及「太古城世界」。其他規模較小的，則有柴灣高威、華富邨大大及屯門仁愛堂等。唔知大家有冇聽過又或者去過呢？不過熱潮維持了約10年便減退，最終連3大名場也相繼在1992、1993年結業。

提起賓仕，70、80後就有許多集體回憶！有人難忘場內的播慢歌和英文歌「拖手仔」時間以及和全場人一齊「拉龍」繞場兜圈；又或是想起當年日去夜去玩通宵，兼且去賓仕參加同學生日會的快樂片段；有人就憶起小時候放學就去賓仕踩Roller、篤波同碌Lane！此外，是否記得80年代許多電視劇、電影甚至MV都在室內Roller場取景拍攝？而歌星呂方在1988年宣傳《愛令我變炭》時，亦在賓仕舉行小型音樂會。

撰文：林登麗

攝影：方偉堅（部分）

網址：http://buns2020.com.hk/