Kiteboarding衝浪風箏 凌空翻騰

簡單來說，這運動是結合了滑浪與風帆的X-Game，借助風力升起風箏，再藉由雙手操控高度與方向，於衝浪板上做出自由度高的花式動作，絕對High過傳統Wakeboard；加上唔使快艇拖行，可慳番唔少租船錢添！

Kiteboarding於歐美兩地有着不同叫法，美國稱Kiteboarding，而歐洲則叫作Kite Surfing。據中國香港衝浪風箏總會教練Keith指，Kiteboarding近年傳入香港，主要以四線操控充氣風箏，然後在水面滑行，甚至可利用風力跳躍至十幾米高。Keith表示：「如果新手想學Kiteboarding，應該搵正統訓練學校學習，以中國香港衝浪風箏總會的入門課程為例，當中包括3堂、每堂4小時的課程，內容包括分析天氣、風向預測、地理選擇，還有裝備使用和安全守則等，收費約$4,500，經過考試便可獲得IKO三級證書。有了這張證書便可於全球52個國家玩Kiteboarding和租用器材。假如純粹想試玩的話，另有一天體驗課程，4小時收費約$600。」

裝備方面，Keith表示Kiteboarding基本只要有風箏（Kite）、腰帶（Harness）、手把（Bar）同衝浪板（Board）就可以玩，全副裝備大約$15,000至$20,000不等。如果覺得購買裝備太過昂貴，亦可以到總會租借，全套裝備租用4小時約$1,200。但出發玩Kiteboarding前，記得留意天氣、地形和風向，Keith指出：「香港的熱門Kiteboarding地點有大嶼山貝澳、水口灣及屯門龍鼓灘等，呢幾個地方一來後面冇山，唔會擋風；二來人少，唔怕騷擾到其他人。不過玩唔玩得成最重要係睇天氣，要夾啱風向同風速，風力至少要4級以上才可升起風箏，而且一定要揀向岸風，因為向岸風才可將玩家吹埋岸，否則吹出海就好危險。」以今次試玩的大嶼山為例，如果當日吹西南風就會揀貝澳，假如吹北風就會去水口灣。

萬事俱備便可出發，去到海邊第一件事是張開風箏充氣，唔好以為用氣泵充氣好容易，原來都有技巧，切勿利用雙手和腰部發力，應以兩腿屈膝動作進行充氣；然後便可穿上腰帶，並透過4條堅韌的繩繫上風箏與手把，再將手把扣在腰帶，最後踏上衝浪板就大功告成！Keith建議：「為了安全起見，初學者可以外加頭盔同救生衣，而救生衣可以着於腰帶外面，玩熟咗先唔用。」雖然Kiteboarding同Wakeboard驟眼看有少少相似，但操作原理卻各自不同。「Wakeboard是利用雙手拉緊手把，而Kiteboarding則是透過腰部拉動，手部純粹控制風箏的上升、下降和轉速，可以跳上水面玩翻騰動作；如果風力夠強，甚至可以跳至幾層樓咁高，比Wakeboard自由得多。」

地址：大嶼山水口灣82號

查詢電話：5100 4295

網址：www.kiteboarding.org.hk

如想記低玩衝浪風箏時的刺激一刻，不妨在頭盔或衝浪裝備上，安裝專為X-Game而設的迷你攝錄機。Oregon Scientific推出的ATC Mini備有20米防水功能，除了可拍攝720p高清片，還支援32GB microSD卡及1.5小時電力，體積只有8.5×4×4cm，可說是機細功能強。

查詢電話：2111 0703

撰文：黎子豪

部分攝影：張群生

模特兒：Kitty（M.Spy Model）