政情：將軍澳擬增街渡張美雄黎煒棠互數

作為香港第7個新市鎮嘅將軍澳，近年發展迅速。然而自成一角嘅地理位置，對外交通乃頭痛問題。為求喺陸路車輛以外再多一個選擇，當區居民長久以來都有發展海上交通嘅訴求。早前運輸署擬開辦將軍澳至西灣河嘅街渡航線，儘管有待招標，但西貢區議員張美雄認為係大好消息，日前拍片向街坊介紹將來嘅街渡服務；然而另一邊廂，就有該區前區議員對擬開辦嘅街渡航線大潑冷水，又不點名咁批評有政客好似放煙花咁提出一大堆建議，卻不顧是否可行。

其實運輸署係就將軍澳南往來西灣河、及西貢往糧船灣至滘西村嘅街渡航線進行招標。張美雄指前者最快將會於今年第二季投入服務，屆時市民就可以多一個交通選擇而毋須「焗住」搭港鐵。至於街渡服務係每日朝7晚9，每45分鐘一班船；由將軍澳南出發，約30分鐘到達西灣河。張美雄又話會致力爭取不同嘅交通服務，打破港鐵嘅壟斷。

現時規劃航線難保客量

之但係，西貢前區議員黎煒棠就唔係咁睇啦。佢喺社交平台貼文，話當年討論渡輪最熾熱嘅時候，主要係將軍澳隧道日塞夜塞、同埋港鐵過海段超負荷，若果當時有渡輪服務的話，無疑係對外交通嘅另一選擇；況且渡輪碼頭亦都係區內規劃之一，於是就有開設街渡服務呢個議題。不過將藍隧道去年通車之後，對於改善交通有立竿見影嘅效果，將軍澳隧道車龍少咗起碼一半，加上緊接嘅T2主幹路及中九龍幹線工程亦都火如荼，未來將軍澳直通西隧口都唔使15分鐘。由於同巴士及港鐵相比，30分鐘嘅街渡行程並無多大嘅優勢，憂慮出現一條不可持續經營嘅街渡航線。

就街渡航線能否持續經營嘅質疑，張美雄話唔同意航線係「蝕硬」嘅講法，張話為進一步保障街渡服務可持續長期營運，已向區議會提交動議，促請運輸署研究喺日出康城，甚至喺調景嶺等合適位置加設上落街渡地點，以彌補港鐵同巴士班次不足之餘，亦可藉此增加街渡渡輪嘅客量。

黎主張水上的士試水溫

然而黎煒棠就主張，倒不如以水上的士之類嘅服務，先安排喺周末、同周日試水溫。佢話作為街坊，有選擇總比冇選擇好，但分析利弊之後，到底仲會有幾多人選擇搭船？佢話政治人物為咗多一樣「成功爭取」，有啲朋友會不斷提出建議，不理會是否執行得到。政府為有關街渡航線開標但無人回標，先至係佢最擔心嘅事。