政情：藍領工作存偏見 教育政策須改變

林振昇動議時表示，本港出現嚴重人力資源錯配，而隨着科技發展及產業轉變，單一嘅學術教育難以滿足社會生產力嘅發展，佢促請政府全面檢討現行教育政策，加強職業教育發展、提高應用學習科目嘅認受性，同埋檢討學徒訓練嘅制度，為香港培養多元化人才、傳承技術技能，從而實現本港產業多元發展、創造更多就業機會，增強本港競爭力，以促進社會向上流動。

議員林素蔚就提到近期爆紅嘅「街市肉類分割員」現象，認為雖有保守思維，嫌技術性工種唔夠得體、無文化，但佢強調職業無分貴賤，而從早前院舍欠缺護理人員一事，已反映政府未有重視技術性人才，需由內地輸入護理員解決，實屬本末倒置。勞工界議員梁子穎，就指現今社會仍普遍存在讀好書先至能搵好工嘅想法，正規學校以外嘅成績談不上「正統」。梁主張學生應配合個人興趣及專長，達致愉快教育，否則換來嘅只有壓力。

議員周小松則指出，現行嘅職業教育有偏差，令人力資源錯配，缺乏年輕人入行，後果就係運輸從業員出現斷層嘅情況。至於副學士課程，就令好多學生「高不成低不就」，其學歷認受性亦相對較低，而多個教育機構亦欠缺協調，缺乏整體長遠視野，形成「有工無人返，有人無工返」嘅現象。周建議政府推動大企業或工會走進校園，解說職業教育嘅出路，增加其認受性。

對於幾位議員嘅睇法，教育局局長楊潤雄表示認同，指當局會加強喺中學推廣職業教育，令年輕人及早認清目標同作出選擇，楊又話會透過職業教育為不同志向嘅年輕人，提供多元化嘅學習途徑。之不過要改變公眾、尤其是家長對職業教育嘅觀感，難免需要多方面嘅努力，同埋較長嘅時間。照咁講，藍領行業新血不足嘅情況，有排都唔會改變。