政情：林筱魯︰釐清發展保育定義 防收地補償爭議

林筱魯話今次嘅修訂方向正確，但都冇可能完全排除收地爭拗，認為收地所面對嘅問題不單只係金錢問題，而係點樣重置產業。佢質疑政府透過收地進行保育做法唔合乎成本效益，目前沙螺洞透過換地保育同荔枝窩等都只係使咗幾億元，但收地方式就至少要過百億元。

至於長期困擾香港嘅房屋問題，林話即使改建社區隔離設施，亦只可以提供一萬幾千個居住單位，不足以令市民安心。林又指政府提出嘅《長遠房屋策略》，定下10年總房屋供應包括30萬個公營房屋單位嘅目標，然而預計頭5年只落成三分之一，餘下三分之二要喺後5年落成，形容係「頭輕尾重」嘅問題。林建議政府聚焦長遠房屋建設，積極研究壓縮程序，解決未來5年土地房屋供應。

出席同一節目嘅建築、測量、都市規劃及園境界議員謝偉銓就話，現有嘅收地框架沿用40多年，而新界偏遠地區嘅基建交通已改善，發展用途亦有變化，認同有需要檢視現有收地安排。佢相信加大補償金額短期內可以加快收地，但憂慮長遠會對市場買地價格造成牽制作用。

謝認為下屆政府提出嘅「公屋提前上樓計劃」短期內可增加市民上樓機會，但如果喺配套同埋基建不足下入伙，可能會引起不必要申訴，最終都要增加房屋供應量。至於係咪應該以社區隔離設施用作過渡性房屋，佢認為唔應該一刀切，部分市民考慮硬件同位置後，可能傾向選擇住喺劏房，所以最重要嘅仍然係加快興建公營房屋咁話啦。