政情：當局撐港鐵表現穩定 議員對罰款唔收貨

議員謝偉銓提出口頭質詢，要政府交代對港鐵多宗事故嘅跟進工作；議員張欣宇指市民只能通過年報了解港鐵表現，難以判斷其質素；議員李梓敬亦質疑，現行事故罰款額同港鐵盈利相比只佔小部分，建議改為因應事故嚴重程度，扣減相關高層嘅薪酬。運輸及物流局局長林世雄回應話，港鐵每年8分鐘以上延誤維持喺低水平，會透過機電工程署恒常監察，以及喺董事局聽取港鐵匯報。林亦指已經要求港鐵就本月油麻地站車門飛脫事故，喺兩個月內提交報告，又話關注近期接連發生站內扶手電梯「炒梯」事故，林表示會要求港鐵向管理層發放花紅時，需考慮服務表現，包括曾否出現嚴重事故。

林世雄又提到機電工程署喺去年展開主動同全面嘅審核，對列車車門狀況、維修紀錄等情況進行抽查，確認港鐵就維修車門工作大致穩妥；港鐵亦委聘專家就車門導軌及其他結構部件，進行金屬物料嘅硬度測試同分析，顯示車門結構正常。議員田北辰喺會後批評當局，並無回應港鐵點解唔提早更換新列車嘅理由，又指港鐵信號系統更新工程由2015年到今年都尚未完成，揚言話若再發生甩車門嘅情況出現，唔理係咩原因，都會「同佢死過」。