「安定猛牛」發揮搏命本色
「有時佢可能唔聽指令，但又入到波令球隊贏波，咁我都『吹佢唔漲』，佢算係細細個就出咗名，所以有啲偶像包袱，如果之後要繼續打上去，就要放低身段同多啲聽人意見。」安定猛牛教練李旭川所指令自己又愛又恨的球員，正是隊長鄭偉鏗。
年僅19歲的鄭偉鏗目前就讀嗇色園主辦可藝中學，擔任得分後衞並擅長外圍及三分投射，此子更曾於金盃賽4強首回合狂轟31分，屬安定猛牛得分主力。然而這位明星球員卻透露因長期自我要求過高，繼而患上躁狂症：「第1年打波已經係咁，當打得唔好嗰陣就會有，但我通常喺場內會盡量抑壓自己，打完比賽先至發脾氣，好似打牆等，唔想畀隊友睇到，驚影響佢哋情緒。」
全力爭勝打出名堂
「屯門牛吖嘛！球隊嘅優勢係唔要命，另外我哋比較團結，大家早已認識，所以好有默契。」「阿鏗」打趣地說出球隊優點，他笑言分組賽面對逸東一仗便是最佳例子：「最多試過落後20分，不過隊友唔要命咁搏命守波，最後1分鐘連追13分打和，雖然隊友（梁靖熙）唔好彩犯規送咗個罰球畀人，去到黃金入球輸波，但呢場比賽真係好難忘。」
即將踏上《邨JUMP!》決賽舞台，「阿鏗」表示以平常心對待，不會特別緊張，惟代表屯門出戰的他，心目中原來有一個更宏遠的目標：「屯門一直都係唔畀人睇好嘅地方，畀人睇低一班，基本上名校都係出自於九龍區、港島區，屯門區就算打得勁嗰一兩間都唔會成日畀人提起。依家打贏咗其他屋邨，希望證明屯門可以同出面嘅人爭。」
李浚湣、鄧曉欣報道