周家樂踢出新天地

周家樂今季之前一直效力理文，早兩季只曾在「菁英盃」賽事中亮相，但這些寶貴的經驗也讓他意識到自身不足：「體能、力量同外援冇得比，健身、操體能一定在所難免，同時都要知道自己有乜嘢優點，我畀波好啲，就唔好同對方咁多身體接觸，盡早甩腳。」奈何上季聯賽停擺期間，收到被舊球會放棄的消息，一度令他感到灰心，「唔多唔少有啲唔開心，因為佢係覺得我唔得，先至唔要我。」

曾遭放棄焉知非福

「此地不留人，自有留人處」這句說話正好形容「家樂」，在自由人足球學校創辦人蘇來強協助下，他被推薦到流浪試腳，僅一課後便得到對方的賞識，更獲委派出戰民間賽事，最終奪冠而回。「嗰度唔要我唔緊要，流浪好好咁樣要咗我。」周家樂苦笑道。

放大圖片	周家樂今季經常為流浪處理死球。

司職中場的「家樂」是一名左撇子，因此亦逃離不到大部分本地左腳球員，被安排踢左閘的命運，但他坦言不介意，更重要能夠展示實力，特別是「家樂」處理死球的能力不俗，有時甚至會接替「死球專家」林嘉緯主理罰球和角球的工作。

周家樂亦透露，會經常仿效「嘉緯」的踢法，而被另一「老大哥」盧均宜戲稱為「肥仔」的他更直言，流浪今季有兩位前輩帶領着，有助一眾小將成長：「佢兩個經常會同我哋講，踢每個位有乜嘢地方做得好同唔好，逐樣細節教我哋。」

「家樂」今季暫時為流浪各項賽事披甲14場，當中最令他難忘莫過於季初作客冠忠南區一役：「輸緊1比2嗰陣我有球波處理得唔好，轉個頭畀人打反擊拉開比數，嗰球波我都相當自責。」幸好他及時調整，先將皮球精確傳送給「均宜」頂成2比3；後再斜角長傳予黃駿軒，間接造就法蘭度射入扳平3比3，這兩記關鍵傳送可謂完全將功補過。

給予機會茁壯成長

「呢度畀我睇到係聯賽都有機會出場，一個完整嘅球季可以參加好多比賽，唔係只得『菁英盃』。」周家樂吐出這句深藏心底已經數年的說話。的而且確，出場機會才是年輕球員成長的最強催化劑，大球會往往視成績為優先，卻忽視讓幼苗成長的機會；相反流浪則能讓周家樂這位後起之秀初試啼聲，在綠茵草場得到更多鍛煉機會，才得以茁壯成長。

雖然流浪今年的實力未足以躋身爭標行列，卻曾有能力左右大局，陣中小將更有機會擔任正選，一展所長，這亦是令「家樂」從未質疑過當初加入流浪的原因，「流浪畀到我嘅係機會，起碼證明到自己都有番啲價值，畀人知道邊個係周家樂。」他謂。

圖、文：黃雋謙