再演反勝天水圍飛馬3:1挫愉園
昨晚港超聯賽事，榜尾的愉園於旺角大球場對天水圍飛馬。結果「反Cup專家」飛馬在上半場先落後下，下半場再次上演大逆轉，憑達施華、黎格爾及山度士建功，以3比1反勝愉園，鎖定以聯賽3哥之位躋身爭標組賽事。
「快活谷」羅拔奧度先開紀錄
開賽初段飛馬控制戰局，12分鐘一對中堅上前製造攻勢，基斯頭槌二傳，古安奴門前精彩掛射，可惜越門而過，16分鐘孫銘謙無人看管下施射，同樣偏離目標。受壓的「快活谷」24分鐘先開紀錄，伍家揚底線傳中，羅拔奧度近門撞入。落後的飛馬34分鐘角球攻勢，黎格爾頂失，伏兵遠柱的謝朗軒補射又告高出，飛馬半場落後0比1。
換邊後如狼似虎的飛馬隨即吹起反勝的號角，48分鐘先有達施華睇定熨死角入網扳成平手，59分鐘黎格爾門前頂成2比1，攻入個人今季「開齋波」。落後的「快活谷」試圖反撲，惟朱偉鈞禁區頂勁射及羅拔奧度起腳笠射，同樣未能考驗梁興傑。75分鐘雙方搏拳，黎培基乘角球攻勢近門勁抽，梁興傑拍出不遠，愉園球員未能補中，飛馬即時策動反擊，黎格爾長驅直進被愉園守衞回身剷走，孫銘謙補射又告掠門而過。80分鐘山度士與黎格爾「撞牆」後抽射得手，末段愉園後備上場的黃智康接應罰球射門，被梁興傑撲出未能追近，飛馬鎖定3比1勝局，愉園全失3分後續居榜末。黃雋謙、李浚湣報道