傑志擺擂台鬥理文

傑志翼鋒 蘇沙

傑志於「菁英盃」雖獲不敗佳績，但面對較強對手便告「啞火」，包括兩鬥理文皆悶和0比0。總教練朱志光指出，上次交鋒球隊取得近7成控球率，奈何「把刀雖利但拮唔死人」，射手加維蘭仍在養傷，他強調今仗要踢得更進取。5場「菁英盃」過後，朱志光認為部分年輕球員均具實力在聯賽擔正：「畢頓、陳晉一同巴拉克幾個都可以踢，出佢哋對面都驚，佢哋唔輕易失控球權，係多年訓練嘅成果。」

黃洋籲球迷入場支持

「藍鳥」隊長黃洋則稱，球隊今季中前場有較多小將，是破門乏力的原因之一，但隨着更多比賽後，他們的能力會逐漸提升。今仗是傑志本季首場主場賽事，「大哥」呼籲球迷入場：「球員透過表現同鬥志影響身邊嘅人，希望真係支持香港足球同傑志嘅球迷，都可以喺呢個環境入嚟睇波。」

傑志箭頭 安永佳

理文中場 顏樂楓

理文於5仗「菁英盃」保持不敗，而且僅失2球，整體表現成熟，主教練陳曉明點名讚揚3位小將張憙延、鄧匡延及劉穎笙。聯賽首兩輪就要硬撼傑志與東方龍獅兩大爭標勁敵，「曉明Sir」坦言是個挑戰。今日再遇上傑志，他認為球隊能否作出有效調整，會是勝負關鍵。新加盟的中堅荷西安祖，已完成隔離並投入操練，「曉明Sir」明言這位西班牙兵能改善球隊高度不足的弱點，但甫歸隊不久，並不急於安排他上陣。

過去兩次與傑志交手，顏樂楓都以正選身份踢足全場，這位理文隊長希望可以在進攻上做得更好：「始終兩場對傑志都未入過波，呢樣嘢一定要進步。」他認為今場對決會是全新的比賽：「對佢哋嚟講可能分別唔太大，但我哋多咗選擇同變化，希望踢出唔一樣嘅效果。」