東方龍獅踢少個5蛋炒晉峰
「中銀人壽香港超級聯賽」昨日掀起新季戰幔，東方龍獅於旺角大球場迎戰晉峰。東方龍獅雖然大部分時間少踢一人，但憑辛祖及盧卡斯各自梅開二度，加上艾華頓的入球，輕鬆以5比0擊敗晉峰，新季旗開得勝。
晉峰開局較主動，2分鐘費利浦薩禁區內窄角度施射，被葉鴻輝接實。9分鐘廖億誠打到利馬「荷包」，突破後推大位起腳，惟角度欠奉未能造成威脅。東方龍獅站穩陣腳後主導形勢，15分鐘盧卡斯禁區頂攻門僅告斜出，21分鐘此子窩利抽射卻欠運中柱。踢至29分鐘，晉峰鍾俊濠禁區內剷跌辛祖被判罰12碼，後者操刀炮製今季港超聯首個入球。領先1球的東方於32分鐘少踢一人，陳浩瑋踩到何浚皓直接領紅被逐，但東方火力未見減弱，40分鐘盧卡斯接應黃威角球門前建功，東方半場領先兩球。
辛祖盧卡斯齊起孖
換邊後49分鐘東方龍獅再獲12碼，盧卡斯冷靜射入拉開至3比0，落後的晉峰「破蛋」不成，61分鐘反被後備入替的艾華頓門前頂成4比0，加上79分鐘艾華頓落底傳中造就辛祖起孖兼「埋齋」，東方龍獅揭幕戰豪派5蛋，先聲奪人。
東方龍獅總監兼主教練李志堅賽後稱讚晉峰早段的進取態度：「我覺得好有壓迫性，當然我哋經驗好啲攞番個控制權，呢個係關鍵。喺穩定勝局後，畀啲傷愈嘅球員出嚟攞番狀態，呢嗰係我最滿足嘅地方。」落敗的晉峰總教練何信賢承認發揮欠佳，尤其防守死球令人失望：「輸第一球後我哋嘅部署都係攻，對手咁強死守唔係辦法，但奈何再輸多個死球，練咗防守死球成個禮拜，都係失敗咗。」他在受訪時一度哽咽，仍不忘感謝球迷入場支持。圖／文：林卓臻