理文和傑志出線有排鍊

由於昨日頭場飛馬全取3分，令兩軍踢得特別肉緊，甫開賽便互相搏錘，4分鐘理文狀態大勇的張憙延，突入傑志心臟地帶傳中，王振鵬快一步擋走皮球。6分鐘後基華尼頓推進施射，被艾里奧及時閂走。13分鐘傑志反擊，基爾頓主理罰球，今場擔正的史雲斯頓撞射被擋。4分鐘後理文獲黃金機會，張憙延避過對手起腳卻中楣彈出。傑志其後掌控戰局，惟安永佳及史雲斯頓先後埋門，均未能考驗理文門將陳嘉豪，兩軍半場互交白卷。

換邊後「藍鳥」繼續施壓，48分鐘陳晉一門前施頂偏離目標。61分鐘理文黃俊皓被牽制下卧射又中楣彈出，基華尼頓意圖補中卻被王振鵬神勇撲走。及後戰況膠着，傑志率先換入鄭展龍變陣，理文隨後亦派出梁嘉恆加強進攻，後者72分鐘傳交顏樂楓攻門，又被王振鵬化險為夷，最終雙方繼首循環後再次「窿對窿」，各得1分。比賽末段發生小插曲。黃俊皓與丹尼一次皮球爭奪，引起雙方職球員理論，兩軍有些微肢體動作，當球證鳴笛完場返回裁判室之際，亦遭到觀眾謾罵。

曉明Sir滿意賽果

理文主教練陳曉明認為雙方表現精彩，相信每位球迷都享受。理文現時只領先天水圍飛馬1分，「曉明Sir」稱仍掌握主導權：「我哋少踢一場，嚟緊仲有2場對流浪，我滿意賽果。」他同時為場上衝突降溫：「最尾大家好緊張，兩隊都唔想輸，明白上心係好事。」傑志總教練朱志光亦就事件解畫：「比賽有呢啲氣氛幾好，但唔好傷感情，場波好緊湊好刺激。」圖／文：黃雋謙