東方龍獅反勝顯霸氣

冠忠南區甫開賽即幾乎博得12碼，佐佐木周接應陳凱柏左路傳中，陳廣豪頭槌皮球彈中梁冠聰手部，惟球證未有表示。6分鐘，亞歷斯祖禁區內侵犯佐佐木周，今次卻未能逃過球證法眼，由史提芬彭利拿主射，冠忠南區領先1比0。東方落後1球下積極反撲，43分鐘，辛祖接應利馬角球，前柱衝頂破網，追成1比1返回更衣室。

堅Sir盼費蘭度聖誕復出

易邊後，東方龍獅控制大局。52分鐘艾華頓右路半傳半射下，皮球省中列文改變方向，笠死南區門將蔡子濤，繼上場大演帽子戲法後再有斬獲，並助東方反超前2比1。由落後變領先，東方龍獅進攻更見凌厲，辛祖於55分鐘取得今仗個人第2個入球，加上梁冠聰在66分鐘建功，終助東方反勝4比1。目前東方3戰得6分，惟對賽成績不及同日贏波的愉園（見另文），暫列小組第2，而冠忠南區初嘗敗仗後則跌落第3位。

賽後東方龍獅主教練李志堅坦言，當球隊落後時部分小將顯得有點驚惶失措，要不斷提醒他們要冷靜：「好似亞歷斯祖咁，佢太緊張同欠缺經驗，未失12碼之前、以及失波後都有啲亂，下半場調番佢去右路表現好番啲。」

今場有鄭子森和艾華頓在上、下半場傷出，「堅Sir」坦言對傷兵潮相當擔心：「辛祖啱啱好番，但盧卡斯同艾華頓都仲有傷，球隊已經冇哂前鋒，希望佢哋以戰養戰。」當被問及新援費蘭度何時可上陣，「堅Sir」笑言希望收到「聖誕禮物」，相信「費7」有望在12月尾復出。文：李浚湣