梁諾恆士哥梅州客家贏波

12碼絕殺江西聯盛

梅州客家開局佔盡控球優勢，再次擔正球隊中堅的「細佬」，亦能夠發揮「帶刀侍衞」本色，多次上前助攻；15分鐘「細佬」頭槌攻門，被江西聯盛門將撲出。梅州客家攻勢浪接浪，殺入對方禁區的梁諾恆，1分鐘後終於把握機會接應傳中頭槌批入，為球隊取得1比0領先優勢，今次亦是「細佬」繼早前對陝西大秦之水一役射入「開齋波」之後，個人再次有斬獲。

29分鐘「細佬」再接再厲，後場頭槌解圍順勢發動反擊，吉森得球後傳給梁學銘，造就後者射成2比0。不過落後的江西聯盛未有放棄，上半場末段靠商隱先後轟入遠射及12碼，個人梅開二度，半場前為球隊追平2比2。

易邊再戰，江西聯盛搶回主動權，不過梅州客家站穩陣腳後，逐漸加強進攻，83分鐘江西聯盛港將羅素魯莽出腳，剷跌梅州客家前鋒多利，球證直指12碼，敦比亞操刀射入，最終為梅州客家奠定3比2勝局。全取3分的梅州客家，以18分暫列B組積分榜前列，而江西聯盛則繼續於B組墊底。

賽後「細佬」接受本報訪問時，表示對自己再次取得入球感到開心，但最重要依然是梅州客家能夠取勝：「覺得球隊今日開局唔錯，好早攞到兩個入波，不過之後有少少放鬆，好彩喺咁重要嘅比賽，我哋下半場可以穩住心態，沉着應戰贏到波。」