「龍哥」，你返嚟啦！

其實，唔只球迷關心「綠戰士」，球員亦都一樣，尤其係今個上半季踢和富大埔嘅球員，年頭先加盟好受球迷歡迎嘅金承龍，就係其中一個。

返咗南韓之後， 金承龍一直都有保持訓練，有球隊跟操就跟，冇就自己操，另外一個星期會去行3次山，目的只係唔想畀自己懶落嚟。「雖然我喺香港嘅日子好短，但我都好享受喺度嘅生活，假如大埔會留喺港超聯而又需要我嘅，我一定會立即返嚟。」金承龍咁講。

有球味好使好用

金承龍喺2、3月嘅閉門作賽，表現非常出色，深受球迷愛戴。要求條件唔高嘅佢，雖然年紀唔細，但就絕對好使好用，相信球迷都好希望可以再次喺港超賽事入面，見到好好技術又有球味嘅「龍哥」。