陳穎霖：向師姐偷師

回憶起遠征土耳其之旅，「穎霖」坦言當時自己十分擔心。「其實落到場比賽都會有啲驚，因為比賽速度比起平常喺香港快好多，而且對手嘅實力亦都好好，我哋好多時都係受到壓迫或者冇波在腳。

「不過一班『師姐』喺球場裏面，一路都有嗌住我，不斷畀啲提示我，所以踢咗一陣之後，其實我都開始定咗落嚟。」

細心觀察傳承經驗

「穎霖」擁有出色的領袖才能，過去無論在車路士足球學校（香港）的女子青少年隊，抑或香港女子青少年代表隊裏面，其實都是擔任球隊隊長。

對於今次在土耳其可以和女足隊長陳詠詩一齊在場上並肩作戰，近距離觀察「師姐」在球場內外的一舉一動，「穎霖」自覺獲益良多，無論在臨場應變以至實戰經驗方面，都帶給自己很大的啟發。

「『師姐』平時喺操練之中講嘢唔算太多，但係佢比賽之前喺更衣室裏面，的確畀咗好多鼓勵我哋一班年輕球員，佢仲會講啲說話去幫我哋減壓，等我哋可以放低多餘嘅心理包袱出去比賽。」一點一滴經驗的傳承，其實莫過於此。