告別21年職業生涯 陳偉豪換角色為港足出力

據「豪哥」透露，於今季早已有掛靴念頭︰「（下季）應該唔踢喇，或者咁講，應該冇得踢！本身上年都諗住唔踢，但開季後『羅生』（香港飛馬會長羅傑承）搵我幫手先至踢番。」被問及有關告別戰詳情，陳偉豪暗示該賽事是為早前退役的多年隊友陳肇麒而設，同時透露自己將來亦有望出戰港甲︰「因為疫情關係，有好多球員都要退落嚟。我覺得係一個好好嘅時機，等啲踢得耐、本身想轉行嘅，可以豁出去唔好諗咁多。又唔可以話係『告別賽』嘅，而係臨走前同球迷聚一聚，等大家有個開心回憶。」

對於早前考慮出選下屆立法會體育、演藝、文化及出版界別一事，「豪哥」坦言經過了解其他業界後，認為自己準備不足而打消念頭︰「我接觸過藝術界嘅工作者，原來佢哋好多都需要政府嘅幫助，但係我對呢個界別完全唔熟悉，擔心幫唔到佢哋之餘，更變成為負擔。」

教波出書為退役球員發聲

將於未來繼續專注有關足球行業的「豪哥」，除了原有的「足球小將」計劃及評述員等工作外，亦即將開設「跟隊唔該」的網上頻道，並將於8、9月發布新書《隊長秘章》。至於較為長遠的計劃，他表示希望能夠為退役球員籌組工會︰「希望有啲專業意見可以畀到足總，如果由一班踢開波嘅人以團體身份去發聲，佢哋嘅接受能力應該會高啲。」

現年38歲的陳偉豪，1999年展開職業生涯，曾效力過二合、流浪、夢想FC及香港飛馬等球會，生涯高峰期主要效力南華，期間獲獎無數，4次獲得頂級聯賽冠軍及多個本地盃賽冠軍，4次當選香港足球明星選舉最佳11人。國際賽方面，他曾65次代表香港隊在國際A級賽上陣，並擔任隊長多年，在2009年協助港隊奪得歷史性的東亞運動會足球項目金牌，而2017年6月7日對約旦的國際友誼賽，是他為港隊披甲的最後一仗。

何彥霆報道