富力R&F復操杜度林恩許下周報到
港超球隊富力R&F相隔近3個月後，昨早再到將軍澳足球訓練中心（FTC）復操。除迪布利、基奥雲尼及古拿等因進行隔離而缺席外，約有16名球員參與操練，包括由中甲梅州客家轉投的徐宏傑。富力主教練楊正光透露，在連續兩日進行較簡單的訓練後會休息數日，下周四正式復操，屆時杜度及林恩許等新兵亦會歸隊。
儘管足總日前公布獲國際足協（FIFA）「特事特辦」，容許短期內約滿或被解約的球員可為新東家於復賽上陣，但類似徐宏傑的個案仍有機會出現變數。「光Sir」坦言要有準備，並指復賽減至6隊猶如「重新洗牌」，爭標更為激烈︰「假如杜度同『傑仔』（徐宏傑）唔踢得的話，後防會好大影響，中前場問題反而不大。現階段好多嘢未能肯定，要有兩手準備。」
勉勵「傑仔」畀心機
對於梁諾恆離隊而加入徐宏傑，「光Sir」認為利多於弊︰「『細佬』係時候出去闖吓，佢呢兩年都有提升水平；『傑仔』喺梅州嘅表現好成熟，而且調動上會靈活咗，因為佢踢左右後衞同三中堅都得。」
提及「傑仔」重返港超，「光Sir」勉勵他勿氣餒︰「我覺得件事未必係咁負面，球員只要畀心機，可能會有更多選擇，好似『樂仔』（陳俊樂）係個好例子，今年見到雲邦賀斯畀好多機會佢，希望佢站穩陣腳！」球隊人腳方面，除林嘉緯及羅港威外，白鶴亦離隊返回家鄉擔任青年軍助教。
何彥霆報道