越級加入港隊U19集訓 趙聡悟尋求突破
在2019年下旬曾代表香港出戰「亞洲足協16歲以下錦標賽」外圍賽的傑志小將趙聡悟（Sohgo），憑着出色的個人能力，於今夏獲港隊教練團邀請，參加了3星期的香港19歲以下代表隊集訓。
對於今次有機會隨香港19歲以下代表隊集訓，Sohgo直言覺得頗意外，他說：「好高興今次獲邀請入嚟參加U19嘅集訓，因為我真係冇諗過自己會獲得呢個機會。經過好幾課嘅練習，我覺得自己嘅技術水平係可以應付到操練嘅要求，不過喺體格方面，我同一班師兄比較，確實係有啲距離。」
享受比賽競爭氣氛
上年曾經代表香港16歲以下代表隊出征新加坡，參加「亞洲足協16歲以下錦標賽」外圍賽分組賽，Sohgo承認自己非常喜歡代表香港出外比賽的感覺。「其實我好鍾意代表香港出外參加高水平賽事，因為有機會同技術優秀嘅對手同場切磋。諗番起上年喺新加坡嘅比賽，踢到分組賽最後一場面對北韓，基本上同一場過嘅決賽冇分別，嗰種競爭氣氛同畫面，我到依家仲係好印象深刻！」Sohgo道。
雖然暫時身形比較單簿，卻勝在個人技術不俗，然而Sohgo透露並未為自己訂立太長遠的足球目標，反而比較在意每一日都要力求進步，他謂：「我當然好希望可以繼續代表香港參加國際賽事，亦都好希望可以喺球會嘅青年軍梯隊之中繼續踢上去，不過目前嚟講，我仲好年輕，仍然有好多方面需要改善，所以我冇話諗得太長遠。但係有一樣嘢我係好堅持嘅，就係要求自己每次練習都要比起上一課做得好、有進步。 除此之外，我亦都希望自己可以練番大隻啲。」