受疫情影響，今年第100屆日皇盃決定改制縮小規模，同時間連獎金都出現通縮！
新賽制底下，日職球隊基本上唔使踢咁滯，只得排名最高兩支球隊，直接參加12月27日嘅準決賽，分途出戰日乙、日丙排名最高球隊，至於以幾時嘅聯賽排名決定出線球隊，其實仲未有定案，依然需要探討。講到47個都道府縣參戰代表，隊數會由過去總數88隊減少至52隊，以求降低往返比賽傳播病毒嘅風險，佢哋由9月中起激戰5輪，決出兩隊同日乙、日丙代表爭入4強。由於地方球隊水準同職業隊差距唔細，估計多數「到此為止」。
比賽規模收縮，獎金當然會打埋折扣。今屆日皇盃冠軍獎金會由1.5億日圓（約1,087萬港元）減至1億日圓（約725萬港元），亞軍5,000萬日圓（約362萬港元）變成3,000萬（約217萬港元），季軍2,000萬日圓（約145萬港元）縮到得1,000萬（約72.5萬港元），但係冠軍一樣可以獲得亞冠盃資格。