「自己第一年踢職業足球，頭嗰幾個月已經獲得上陣機會，真係冇諗過一切會嚟得咁快！」效力標準流浪嘅香港19歲以下代表隊守門員盧兆崎，回想今季第一次參與港超，初嘗職業足球滋味，難免有一番感受。
「諗番起季初，無論係自己首場職業賽事，喺菁英盃面對東方龍獅，抑或係聯賽出戰香港飛馬，呢兩場波都令我好難忘。之後，自己又有機會代表香港，去印尼參加亞洲足協19歲以下錦標賽外圍賽，一切一切真係畀咗好多寶貴嘅經驗畀我，幫助到我成長。」
喺眾多唔同嘅比賽經驗入面，「兆崎」自覺喺抵抗壓力同埋情緒管理方面，確實係有明顯嘅進步。「其實每次上場比賽，我都會得到好多寶貴嘅經驗，不過呢幾個月以來，我自覺喺場上控制情緒，同埋面對壓力方面， 真係改善咗好多。畢竟，職業球隊一切以成績為先，所以我一定要時刻保持專注，務求交出最好嘅表現。」
憑住今季季初嘅出色表現，「兆崎」順利入選香港U19代表隊， 出戰2019年11月喺印尼舉行嘅U19亞錦賽外圍賽，仲喺對北韓嘅比賽中屢救險球，協助港隊以1比1賽和對方。 雖然最後出唔到線，不過「兆崎」都話當中嘅過程對佢嚟講，絕對係獲益良多。「 雖然幫唔到港隊出線， 不過已經足夠令我意識到，國際賽戰情每一刻都好緊湊，作為一個守門員，時刻都要保持高度集中，亦唔容許有任何犯錯。」
作為職業運動員，當然唔會少得為自己設定一啲奮鬥目標，對於「兆崎」嚟講，爭取繼續代表香港上陣，係一個必然目標。「挑戰成為『大港腳』，當然係我嘅長遠目標，但始終我仲年輕，一切都要按部就班，所以唔會睇得太遠住。目前要做嘅，就係要鞏固自己喺U19代表隊嘅位置，然後再嘗試挑戰U23代表隊，一步一步嚟，希望有朝一日夠實力，爭取成為『大港腳』。」