大家到時記得投票啦！
之前都同大家講過，雖然本地波停咗，但因為報紙嘅版位依然喺度、「我撐本地波」Facebook同IG依然要Update，所以我哋喺球隊冇波練、冇比賽嘅情況下，每日都要去「跑山」同「填海」。
唔想球員少少鼓勵都冇埋
除咗「跑山」同「填海」，「大頭」當然仲有其他嘢搞，其中一樣就係要諗掂個「最佳金球」同「最佳撲救」總選。由於疫情嘅關係，加上8月中復賽之後，新一季會緊接開波，本年度嘅「足球明星選舉」仲搞唔搞呢？但搞唔搞都好，我都希望可以Keep到「最佳金球」同「最佳撲救」兩個獎繼續有。
早排都有人提醒過我，個球季搞成咁，不如今季算，唔好再搞咩總選，費事吃力不討好。但我好唔想咁，雖然獎金唔多，但呢幾年見到得獎嘅球員，都會好開心，若果今季唔搞，球員就連少少嘅鼓勵都冇埋，堅唔想見到咁！
好開心，雖然疫情下各行各業都好困難，但連續冠名贊助咗幾季「最佳金球」同「最佳撲救」總選嘅車路士足球學校（香港），首領「Ben哥」已經答應咗會繼續支持，喺度一定要好認真，再一次講一聲多謝。雖然未知復賽嘅賽程係點，但暫定會喺定咗「8、9月」同「10、11月」嘅候選名單之後，連埋之前嘅每月候選，喺復賽完晒後，開始畀球迷去投票。今次投票期應該會長好多，有進一步嘅消息，我會第一時間更新大家，感謝支持。