體壇巨星內地商業價值榜 C朗居首武磊勁過普巴

中國係無數品牌力圖開發嘅市場,體育明星更加係熱門嘅代言人選,咁邊位體壇巨星喺中國最有叫座力呢?一個有關體育明星商業價值榜嘅調查近日出爐,兩大世界球王C朗拿度同美斯霸佔冠軍同亞軍位置,巴西球星尼馬亦排喺第5位,至於效力愛斯賓奴嘅「中國球王」武磊則排第9位,仲勁過排18位嘅保羅普巴,認真巴閉!

呢個排行榜頭20位當中,足球同乒乓球各佔5人成為「大戶」,不過足球始終都係球迷至愛,頭5位就佔其3。雖然中國運動員喺呢個排行榜霸佔咗一半席位,包括女排代表朱婷、張常寧,以及乒乓球名將劉詩雯等,但前列位置悉數由國際級巨星包辦,除C朗、美斯同尼馬之外,NBA嘅史堤芬居里、勒邦占士同杜蘭特,網球界嘅祖高域都殺入Top 10,朱婷排第6位已經係中國運動員當中排名最高。

醜聞纏身孫楊冇影

呢個調查係根據運動員喺內地嘅「吸睛指數」、社交影響、品牌助力、媒體曝光率、網上搜尋熱度、運動專業度、網上口碑等等數據,綜合計算出嚟。而由於新冠肺炎令到全球體壇賽事近乎停擺幾個月,令世界級運動員喺排行榜嘅位置冇明顯變化。值得一提係中國「水霸王」孫楊之前一直名列前茅,不過早前因為捲入禁藥醜聞,令佢嘅排名急跌。

2020年體育明星商業價值榜

1 C朗拿度(足球)

2 美斯(足球)

3 史堤芬居里(籃球)

4 勒邦占士(籃球)

5 尼馬(足球)

6 朱婷(排球)

7 祖高域(網球)

8 杜蘭特(籃球)

9 武磊(足球)

10 張常寧(排球)