專欄輪住嚟:顏樂楓李毅凱重返Bomber Gym操拳

早幾日見到「光頭」顏樂楓,喺Fb擺咗佢同「阿凱」李毅凱,上咗「轟炸機」向柏榮師傅喺灣仔嘅Bomber Gym度操拳嘅相,估唔到兩個都冇下巴輕輕,講咗會返去操就真係講得出做得到。

「大頭」喺17年前因為一次採訪,認識咗「向師傅」,之後仲報埋名跟佢學嘢。不過因為衰懶,唔止同期報名嘅師兄弟,好多之後先開始操嘅師弟妹,都扒晒「大頭」嘅頭,唔係做咗拳手就係教練,唉……話晒都係「光頭」同「阿凱」嘅大大大師兄,就梗係要關心吓佢哋啦!

「我都有兩、三個月冇返去操拳喇,其實好擔心會好似當初第一次操之後,攰到抽晒筋嘅感覺,因為完全唔識點發力,所以之後全身肌肉痛咗幾日。不過,可能『向師傅』知我哋耐冇操,所以都就住我哋,加上冇再亂咁發力,都唔覺有周身痛。如無意外,我好快又會再上去操,你幾時一齊操呀?」「光頭」咁講。

跟「向師傅」學嘢好開心

至於隔咗差唔多兩年再操番嘅「阿凱」就咁講:「好耐冇操,感覺好攰,但係好正,一直都好鍾意呢感覺!操完之後,第日肌肉係有少少痛,但同時亦覺得上番啲力,嚟緊會安排一星期操兩次。我之前都有操嘅,不過多數喺球季之後,因為唔使練波同比賽啲時間會好就啲。最緊要係跟『向師傅』學嘢好開心,一流!」

兩位師弟就咁講喇,咁唔知「向師傅」又點睇呢兩位職業足球員呢?「兩個都好有活力,睇得出佢哋有啲攰,但都好開心好投入咁去操,職業足球員係唔同啲。不過,如果係搏擊活動嚟講,兩個都未係好掌握到踢腳點發力,用咗好多死力,即係好用力踢落個靶度,但入唔到嘅,呢啲操多一排,知道點樣全身去用力就會掌握到,亦都會幫到佢哋喺球場上嘅發揮。勤力啲就好快見到成效,唔好學『大頭』咁懶!」OK!最尾呢段可以Cut咗佢!

大頭