張健峰：踢邊要係敢!
今次《我撐同教練傾吓偈》，「大頭」搵嚟老友，綽號「GPS峰」嘅張健峰，親自回答球迷朋友嘅問題。上季之後退役嘅「張峰」，依家全職喺足總做教練，一直好勤力進修嘅佢，除咗學韓文之外，亦已經完成咗「亞洲足協A級教練牌照課程」，係一個百分百好學好爸爸！
Q：張健峰兄，我最欣賞你落底線傳中絕技。但我發覺現時港超愈來愈少翼衞、翼鋒，是現今戰術不需要，還是現代球員沒技術過人落底線？希望你能培訓多點盤扭出色，可過人落底線的新人。
張峰：現今足球戰術變化多端，翼位球員功能不會限制於邊路，突破入中路配合及埋門經常出現。在本地賽事，過於倚重外援會係一個原因，未必係球員沒有技術，只係唔願意冒險，膽識亦係盤扭嘅其中一部分。
Q：你體能咁勁，係點練番嚟呢？
張峰：體能一向唔係我強項，跟到對嘅教練，慢慢適應就能跟上節奏。一個好有名嘅前輩講過，都唔知跑咗幾多個地球練番嚟！
Q：其實當年係邊隊大陸球隊想簽你？
張峰：最接近嘅一隊係大連的球隊。可惜……
Q：你覺得依家香港球圈中邊個可以追到你嘅成就？
張峰：唔應該以我做準則。做咗教練，特別喺香港嘅環境，如果出外喺高水平嘅地方踢上十季八季，會係一個唔錯嘅成就。梁諾恆、鄭展龍、孫銘謙、梁祐維都係有能力或有潛質的球員，希望佢哋有咁嘅機會！
Q：為何在傑志同巴倫古素合作無間？
張峰：巴倫古素對入球好執着，加上好勤力走動，只要有機會傳中，都好容易揾到佢。
Q：如果小朋友想外流，你有冇咩建議畀佢地；另外職業生涯入面，邊段時間係你最回味？
張峰：家長角色十分重要，建議長假期到水平高國家跟操或比賽，讓小朋友開眼界，日本及南韓係幾好嘅選擇。如能與當地球會保持聯繫，試腳機會都易啲。至於年紀，就要視乎小朋友性格。我最回味『金Sir』（即金判坤）帶領代表隊嗰陣，專業、團結、有凝聚力，令球員有榮譽感。
Q：覺得依家嘅U22或以後有邊啲球員，可以喺高級別聯賽度立足？
張峰：剛過去嘅AFC U19比賽，陳晉一、梁祐維、余在言都有唔錯表現，希望喺不久將來見到佢地喺港超取得成功，甚至能夠立足其他國家聯賽。
Q：球圈中同邊幾個最老友？
張峰：要傾得一定係『豪哥』，學到好多嘢；球場上，『康廉』、伊達、中村、『嘉緯』；教波上，『嘉緯』、『傻邦』。
Q：平時有咩嗜好？
張峰：唱K同打麻雀，不過年紀大就愈來愈少；依家可能諗嘢訓練小朋友嘅時間比較多，同樣都好享受。
Q：「Aiden & Asher（即張健峰兩個兒子）有冇踢波嘅興趣呀？教佢哋容易抑或教其他小朋友易啲呢？
張峰：佢兩個都對足球有興趣！Aiden難教啲呀！哈！哈！
Q：未來諗住點樣回饋香港足壇？除咗依家喺足總做教練外，會唔會諗住教本地球會？
張峰：希望以教練身份去培育球員回饋香港足壇！暫時比較想接觸青少年球員，未有執教球會念頭。
Q：你覺得香港有冇能力，未來可教出一隊能打入世界盃決賽周的香港隊？
張峰：Nothing is impossible！但確實條路仲有好遠，好多地方要改變。
Q：早幾年有報道指你向金泰敏（圖）學韓文為退役鋪路，請問仲同佢有冇聯絡？香港同南韓球會經營青訓上有咩分別？
張峰：有聯絡，早前金泰敏亦有意到港報考『亞洲足協A級教練課程』，可惜過咗報名日期。硬件上有好大分別，本地球會青訓需要周圍搵場地，訓練系統亦好唔同，這些都是我們需要學習及改進。