葡萄牙巨星C朗已經重返祖雲達斯，準備復操，佢嘅女友喬治娜則積極做善事；呢位模特兒喺社交網Instagram宣布，拍賣C朗嘅簽名祖雲達斯球衣，為家鄉西班牙嘅醫院籌款抗疫。
喬治娜將自己身穿祖雲達斯球衣嘅相片上載到Instagram話：「我哋經歷緊一個非常艱難時期，醫院、醫生、護士，所有醫療人員及新冠肺炎病人都需要我哋幫助。西班牙因為新冠肺炎疫情，受到沉重打擊，我都想付出一分力，準備喺社交網拍賣4件靚衫，同埋1件非常特別嘅物品，就係C朗嘅簽名祖雲達斯球衣。」
網民反應非常熱烈，好多人讚喬治娜樂善好施，表明一定會參加拍賣。C朗波衫自然成為球迷爭奪目標，有人更加問件波衫係唔係相中喬治娜着緊嗰件，包唔包埋佢嘅體香，如果有嘅話，真係多多錢都願意買。