加素出口術想返湖人

昂藏7呎（2米13）嘅加素於2001年加入NBA投效孟菲斯灰熊，過往曾6度入選明星賽，最輝煌成績當然是2008至2014年效力湖人期間，夥拍已故球星高比拜仁贏得兩屆NBA總冠軍。同時加素亦帶領過西班牙國家男籃捧走世界賽冠軍，並多次榮膺歐洲最佳球員。不過今年7月將踏入40歲嘅加素，近年深受傷患右腳疲勞性骨折困擾，效力公生同馬刺期間上陣次數大減，今季去到公鹿更加未曾上陣。縱使如此，呢位球星仍然希望可以重新成為湖人一員。

為西班牙征戰東奧

「重返湖人嘅想法從未消失，可以喺我最愛嘅洛城退役係一份光榮同肯定。我雖然同湖人行政總裁珍妮巴斯熟絡，但明白必須證明依家仲有能力為湖人上陣，一切拭目以待啦！」有指加素希望多拚一、兩個球季，除咗喺NBA外，重返成名地——母會巴塞隆拿亦係佢嘅選項之一，不過呢位自2008年起為西班牙男籃攞到2銀1銅嘅奧運「三朝元老」，最想都係再次帶領國家籃出戰明年東京奧運。