今季港超聯預計會喺8月中重啟，不過有3支球隊唔會參與競逐，聯賽榜積分因而要重新計算，調整過後富力R&F、冠忠南區及理文同獲13分，富力以較佳對賽成績暫壓兩支對手高踞榜首。
為咗盡快操番Fit班球員，據悉富力將會喺6月頭開操，及早準備聯賽重開。而上季「香港足球先生」，今季暫時為富力射入11球嘅伊高沙托尼（Igor），依家就仲喺家鄉巴西放緊假，但佢絕對冇偷懶放鬆，反而請咗位私人教練督促自己操練。
日前伊高沙托尼仲上載咗幾段訓練片段喺Instagram，雖然經過近2個月嘅無賽日子，但從片段中睇到睇到Igor嘅身形依然冇走樣。做得本地頂級射手，果然又好波又勤力，咁成功自然有佢嘅原因。
（伊高沙托尼IG圖片）
