梁子駿湊仔攰過返工

睇相就知「握手哥」嘅手工有幾曳。

夢想FC上季後散班，唔踢港超嘅「握手哥」就同姚學文、李思明頂咗夢想足球學院嚟做。聽講開始都做得唔錯，啲班開吓開吓，除咗畀小朋友嘅恒常班之外，仲開埋石屎地嘅成人班，都算上咗軌道。

• 梁子駿屋企湊仔一樣咁開心。

足球學院因疫情停擺

可惜依家畀個疫情搞一搞，間足球學院焗住乜都停晒，做生意經驗豐富嘅「握手哥」都話好大鑊。「有乜計呀？都冇辦法啦！咪惟有等吓先囉！（你有貨唔驚）唔驚？波又冇得教、甲組又冇得踢，好難唔驚喎，好彩老婆有份工咋！依家佢先係一家之主，我全職喺屋企湊仔。嘻！嘻！」

講就咁講啫，大家有冇聽過「放假攰過返工」？好似「握手哥」咁要一個喺屋企湊兩個精力充沛，破壞力有番咁上下嘅囝囝，絕對唔係一件容易嘅事。好似早兩日咁，讀緊K3嘅阿哥「浩霆」，同屬於K2生嘅細佬「浩鋐」，一齊夾埋老竇做手工，扮狼人。只見讀書嗰陣勞作堂負分咁滯嘅「握手哥」，鬼咁好心機「擺晒壇」，又剪又捲又黐，可惜一番心機換嚟兩個寶貝仔黑口黑面，睇到張相真係笑到標眼淚，哈！哈！哈！