專欄輪住嚟：第一次評述電競眼都花

呢幾年除咗大家最常聽見我把聲嘅港超聯之外，講得最多就係搏擊賽事，泰拳、自由搏擊、西洋拳同綜合搏擊都講過；另外，亦喺高手陳國明傍住之下講過桌球，但講打機就係第一次。

佩服「威廉」推動電競發展

平時講波，就算唔睇波衫冧巴，大部分球員我就咁睇住個Mon都認到，所以要我一路講波一路講其他嘢，都唔會有咩阻滯。但講打機完全係另一回事，雖然進攻同防守球員個名會有顯示，但成個畫面會不停有嘢閃出嚟，對於唔識打機嘅中坑嚟講，真係眼都花！所以亦非常配服今次「港超聯在家作賽」嘅主力旁述「威廉」，本身亦係一名電競教練嘅佢，同一班拍檔一直致力推動電競運動發展，希望呢個近年新崛起嘅項目，可以喺香港更普及同正面去發展。

唔向社會大價值觀妥協，只專於自己嘅信念，喺過得自己過到人嘅大前提下勇往直前，「威廉」同佢嘅一班電競戰友，都值得大家為佢哋鼓掌！啪！啪！啪！啪！多兩吓我畀我自己嘅！哈！哈！

大頭