近日唔少球員都喺社交媒體玩「的波Challenge」，大騷腳法之餘，仲鼓勵球迷為防疫繼續留喺屋企。前香港隊隊長陳偉豪見盧均宜、林嘉緯等球圈好友玩得咁開心，都決定加入埋戰團！不過一向多諗頭嘅佢又點會就咁「的波」咁簡單，近日佢喺Facebook上載自己挑戰嘅影片，聲稱「的」咗90分鐘咁話喎！
片段開首「偉豪」就話，發現好多球圈人將「的波」片放上網，但串爆佢哋冇料到，仲借啲意讚自己：「佢哋有啲拍咗幾日先的到嗰10幾下，我本身想做直播展示實力，但諗諗吓驚睇到人電話冇電。」跟住佢仲Show個計時器出嚟話自己「的」到90分鐘：「一場波90分鐘，所以喺屋企做個半鐘運動好閒啫！」
點知佢條「的波」片原來係經過剪接，經目測下實際只係得17下，睇嚟最大騙案係「偉豪」你喎！事後，好友林嘉緯更留言笑稱：「估唔到16歲開始跟你學嘢，學到今日都仲有得學。」盧均宜亦回敬一句：「騙徒手法層出不窮。」
黃雋謙報道