何振廷、孫銘謙僅相識2年，便已分外投契，更互相了解對方。外界經常形容孫銘謙為人欠缺信心，但「阿廷」透露真實的他並非如此：「佢唔係咁冇信心，只係喺人面前表現得好客氣，佢喺球場上踢波其實好有自信。」
「孫銘」亦「禮尚往來」誇獎對方：「『阿廷』好有上進心，成日練完波繼續加操，對住幅牆傳幾百球。」
事實上，兩位最近得以輪流做主角，其實全靠苦練有功，何振廷拆解他們「大爆發」的原因：「『孫銘』之前上網睇到有個人，練射波射咗4萬球，由第一球射得好差，到最後幾球腳腳靚波。之後我哋就參考佢，每次練完波都各自加操100球。」