專欄輪住嚟：居安思危 陳偉豪：餓我唔死！

點知，真係有事發生！原來除咗啲外援之外，同香港飛馬提早「分手」嘅仲有「偉豪」。「『偉豪』點呀？之後有咩打算？」「幫你手講波囉！」「仲有得講實預你嘅！但你會唔會又好似今季季初咁，又有班落？」「好多個月之後嘅事啦，到時再算，有球會簽嘅話，我諗我都會繼續踢嘅。」今季開始之前，見當時「偉豪」話會去踢港甲，咪諗住搵埋佢幫手講波囉，證都幫佢做埋，點知轉過頭就簽咗香港飛馬，做球員兼助教。

考取專業牌照做足準備

咁依家提前回復自由身點算？「其實我今季開始，都有返緊一份工，係文職嚟，依家唔使踢波，咪每日返工囉。」你一向咁多嘢講，唔講多啲？「今次疫情對球圈嘅影響好大，大家做球員嘅一定要居安思危，要早啲去為未來打算，如果唔係一個浪『冚』埋嚟，你毫無準備嘅話，死咗9成！」

問到「偉豪」口中嘅居安思危即係點呢？「哦！咪好似我咁囉！我好早已經有地產經紀牌、保險牌同教練牌，早兩年亦都開始咗『足球小將』呢個計劃，所以就算真係唔再踢波，我都唔會餓死先！我唔係『寸』，呢個係事實！」

無錯！你識得居安思危係事實；但你寸，亦都係事實！

大頭