疫情困擾令全球大部分人都要居家隔離，但細小嘅屋仔又點會困得住頭腦嘅無限創意。有冇諗過一個小小嘅吹氣嬉水池，除咗畀小朋友浸吓水之外仲可以做啲乜？荷蘭女子長途泳將雲露維度就話畀你知，呢個吹氣池都可以令佢保持極高訓練量，唔知各位泳手又有冇興趣一試呢？
全球運動明星呢期最流行做家居運動，足球員玩「的波」、網球手喺有限範圍輕輕力對打，同佢哋喺慣常比賽中嘅力量型發揮相比，真係完全唔過癮。2016里約奧運女子10公里馬拉松游泳金牌選手、荷蘭泳將雲露維度不甘受困，早幾日望住家中嘅吹氣嬉水池諗計，結果畀佢靈機一觸度出訓練絕橋，試過真係Work之後，仲拍片擺上個人網站同朋友分享。
呢個放喺雲露維度家中花園嘅圓形嬉水池只係水深及腰，身高1米72嘅佢伸直手腳都幾乎碰到池邊，究竟可以點練呢？原來雲露維度用一條索帶就解決晒所有問題，佢將索帶一端綁喺穩固嘅地方，另一端綁喺自己條腰，就係咁好成功不斷游，情況就好似玩跑步機一樣。「所有事情都有解決方法，只要你有創意嘅話。」雲露維度話唯一未解決係水溫問題，因為太凍，所以每次只能游45分鐘就要小休。
為咗喺東京奧運攞到好成績，雲露維度講過每星期要進行10堂、每堂3小時嘅訓練，認真勤力。