林恩許心變初衷不變

甘為傑志做聯賽基石

還記得Jared數年前受訪時表示，加盟傑志其中一個原因，是希望透過參加亞洲球會級賽事，向澳洲球壇展示實力，以完成重返澳職的長遠目標。回望這數年，傑志參加過「亞協盃」以至「亞冠盃」等大大小小戰役。奈何Jared自加盟至去年，未曾躋身過球隊征戰亞洲賽的外援名單，理想與現實之間的距離看似愈來愈遠。「做足球員最難過，莫過於只係可以喺場邊睇住隊友踢，自己冇得踢。」當中令他最感無奈的，是前年未能替傑志出戰「亞冠盃」的經歷：「其實都知道嗰季，球會會簽個大人物番嚟踢亞冠，當你有一個好似迪亞高科蘭咁高級數嘅隊友，又真係冇得投訴。」Jared苦笑道。他續分享一段深刻的經歷：「有場波球隊作客天津，我同Fans一齊喺電視睇住球隊輸波，最慘嘅係我會諗，假如自己喺嗰度，或者更加可以幫到手，不過世事邊有如果？哈哈！」

一次又一次的冀望，一次又一次的失望，Jared自問也曾懷憂喪志，但漸漸地察覺，自己其實擁有一個更重要的角色：「每當隊友喺Weekday出戰亞洲賽，我就知自己要做好Weekend嘅工作。」踢好每一場，難道不也是他的初衷嗎？

Jared所指的，是每逢周末他都要盡其所能，踢好每一場聯賽，以確保傑志奪得港超冠軍，保住代表香港出戰亞洲賽的資格，他清楚自己任重道遠：「特別係2017-18年球季全季不敗，我同林柱機、林志堅等前隊友，每逢周末都會精力充沛踢盡每一場波，最重要係幫助到球隊贏冠軍，下年繼續踢亞洲賽！」

目標為香港披起戰衣

今年年初，傑志公布出戰「亞協盃」的外援名單，林恩許自2016年加盟球會後，首次榜上有名，總算達成當初定下的其中一項目標。不過Jared坦言，已不再憧憬回歸澳洲球壇：「就算睇番依家嘅澳職，水平同發展都唔係話太好，所以返澳洲踢波都唔算係一件特別大進步嘅事。」而距離入籍香港的7年居住門檻尚餘3年，訪談中Jared也靦腆的承認，希望繼續長留於此，最終達成穿上「紅色戰衣」的目標：「老實講當我啱啱嚟到，對香港完全冇乜了解，但當我喺到住咗4年，香港漸漸成為我屋企，2個小朋友又喺香港出世，所有嘢慢慢轉變咗我嘅決定，或者留多幾年，我可以成為香港人代表港隊呢？」

目標由回歸澳職，轉變為穿上香港隊波衫，或者很多人會批評Jared無大志，但試問誰又有資格用自己的主觀願望，評價別人的最終理想？代表香港隊，總算是所有愛香港的足球員之最大榮譽吧！

圖/文：黃雋謙