唔做二奶仔快艇掟31億買地起主場
寄人籬下嘅生活，唔係個個頂得順，何況係身家達到500億美元嘅超級富豪！洛杉磯快艇向來名氣同成績都不及同市嘅「紫金兵團」湖人，而且一直共用嘅史達普中心都係招呼湖人為先，聽見球迷對冇真正主場充滿怨言，快艇老闆保曼打算以4億美元（約31億港元）買入使用超過50年嘅湖人舊主場論壇球場，以後快艇有自己嘅獨立主場用喇！
想取代湖人做一哥
快艇近年成績有起色，主要原因係保曼自2014年入主後開始大展拳腳，今季不惜代價引入冠軍級球星李安納同保羅佐治，目的都係指向NBA總冠軍。不過使用場地方面要睇湖人面色，就令保曼相當冇癮，佢之前講過想買地興建能容納接近2萬名球迷嘅綜合大樓，除咗作為快艇主場之外，入面仲有商店、餐廳及展覽館等包羅萬有，不過一直都買唔到心水選址。今次極有機會以4億美元買入論壇球場，相信保曼呢項預計耗資10億美元嘅大計有機會圓夢。據報呢幢綜合大樓可望於2024年落成，屆時肯定吸引洛城球迷眼球，快艇隨時取代埋湖人嘅「一哥」地位都唔奇呀！