休戰55日復出林嘉緯嗌緊張

「自己都好期待呢場波，因為差唔多成兩個月冇比賽，雖然一直保持住練波，但始終係兩回事。踢咗咁多年今日都有啲緊張，始終太耐冇比賽，同埋嚟到富力都有一定壓力，喺我上嚟嘅時候佢哋喺聯賽排緊第1，如果有乜嘢差池，都會有壓力！之前球隊喺『銀牌賽』同『菁英盃』都出咗局，所以我哋今年一定要捧盃！」「嘉緯」道。

「入唔到波有啲忟」

雖然久疏戰陣，但「嘉緯」今仗表現並不失禮，上半場一記熨射中楣，下半場亦有一記抽射被擋出，造就隊友伊高沙托尼補中，不過他直言「恨入波」：「直情有啲忟！始終入到波對信心有幫助，但整體嚟講，對自己嘅表現都接受。」「嘉緯」強調，期望今季能夠協助富力贏得錦標︰「我都希望可以繼喺傑志之後可以再捧盃，呢個係我一直嘅目標，唔想做後備或者就咁完咗職業生涯，一路挑戰落去！」

圖/文：何彥霆