on.cc東網直播A組煞科戰爭食尾胡 東方龍獅香港飛馬搏足120%
由香港足總呈獻的「2月閉門作賽」賽事直播停不了，今午在賽馬會香港足球總會足球訓練中心（FTC）會上演A組煞科戰，由東方龍獅對香港飛馬。兩軍今季曾二度交手，雙方各贏一場，雙方小將誓言搏盡，定要在分組賽食尾胡。（on.cc東網周五下午1時直播）
東方龍獅上仗勇戰至末段才失守，雖然最終以0比1僅負傑志，但依然展現出頑強鬥志。今仗對飛馬，前鋒盧卡斯需坐波監，缺少主力箭頭人物，進攻重擔將落在U22小將茹子楠肩上。「茹子」則希望，能與好拍檔播磨浩謙（Tiger）擦出新火花：「我同『Tiger』由細到大踢開波，對大家嘅踢法都好熟悉，希望可以一齊製造出具威脅攻勢。」
茹子楠「超齡前」最後一戰
FTC場地時常颳起大風，「茹子」坦言多少會影響到球隊表現，可幸他們曾多次到此操練，環境適應已不成問題。此外，今仗將是「茹子」最後一次以U22球員身份出戰「菁英盃」，他希望這幾年來心態上的改變，能助他取得入球：「呢次係我踢嘅第三屆，前兩屆年紀比較細，唔係好夠膽起腳，怕射失會畀隊友鬧，但依家發覺原來放膽去射，可能會有驚喜，咁樣反而幫到球隊。」
而香港飛馬同樣自去仗不敵傑志後宣告無緣晉級，令對東方一仗頓成「例行公事」。在外援大衞拉菲爾受傷，加上陳柏衡、米高加斯洛及陳肇麒停賽下，今場僅能以殘陣應戰。本季已為飛馬上陣11場的19歲中場雷傑名表示，即使球隊已出局，作為職業球員必須以專業態度面對比賽：「我哋仲係好想贏，唔會因為出咗局就Hea，會照用爭出線嘅心態踢。」
雷傑名︰出線無望仲想贏
對手東方擁有多名技術好、速度快的外援球員，擔當中場防務工作的「雷名」認為，踢法要變得更聰明：「對住外援速度唔夠快，所以惟有靠遮線彌補，唔好畀佢哋輕易轉身。」雷傑名今季在「菁英盃」共上陣6場，其中在首輪對理文的賽事射入一球，令人眼前一亮，惟他未敢自滿：「要Keep住個心態，唔好覺得自己有得踢就算，要喺訓練上再努力啲，嚟緊對東方場波我會畀盡百二分力去踢！」
圖／文：黃雋謙