郭嘉諾實踐最fresh知識
郭嘉諾帶最fresh知識入元朗！佳聯元朗昨進行鼠年首課正式操練，同時公布「風車sir」郭嘉諾正式回巢做主教練，陳文俊則退居幕後擔任助教。目前正修讀亞洲足協專業教練牌照課程（AFC Pro Licence）揚言，希望把這課程學到的最「新鮮熱辣」方法，實踐到佳聯元朗身上，助「橙軍」力爭上游。圖/文：陳焌鏗
因應武漢肺炎疫情持續，昨日佳聯元朗改往賽馬會香港足球總會足球訓練中心開操。外號「風車sir」的郭嘉諾，今季初曾加盟和富大埔與馮凱文合力執教球隊，後來卻因有導師被解僱而導致「Pro Licence」課程延期至今年初，結果因未能兼顧亞洲賽於去年11月決定請辭。無奈課程在復課後，最近因為疫情而再度延期︰「我個『Pro Licence』課程唔知幾時先可以返內地上堂，之後法比奥打過畀我好多次，『王生』（球會會長王威信）都有搵過我。我覺得一定要繼續留呢個球圈，用最近距離去睇球員，感受香港足球嘅變化，所以好開心可以以一個短期嘅形式返嚟元朗。」
用4個月保港超席位
目前佳聯元朗於聯賽排第9，陷入降班危機，「郭Sir」坦言雖然只有4個月的時間，但仍希望把教練課程所學到的新知識注入球隊︰「我哋開會都有講呢個係一個4個月嘅project，最終唔係淨係為球隊，而係球員佢哋自己。大家都知道元朗呢隊波係好耐歷史，所以亦都唔想佢哋降班，呢一個係我返嚟嘅其中一個原因。我自己希望可以將喺『Pro Licence』學到嘅嘢，可以好fresh（新鮮熱辣）咁即刻用到出嚟。最後我都好掛住一班元朗嘅球迷，佢哋喺上年同我經歷咗好多高高低低，我有一個遺憾，就係唔可以將一個冠軍送畀佢哋。今年我哋喺菁英盃仲有機會，而足總盃都未開始踢，希望可以喺呢啲比賽攞啲好成績。」
盼容許球迷入場打氣
面對着康文署場地暫停運作，港超聯及其他本地賽事的安排，仍有待足總周一（3日）開會商討，不過郭嘉諾已着手備戰下輪對富力R&F的聯賽︰「已經做咗兩個禮拜嘅plan去準備呢一場比賽。無論場波踢唔踢，或者有冇觀眾都好，我覺得工作係要繼續，因為踢波係足球員嘅工作，亦都係我作為教練嘅工作，我哋係冇得home office。」
同時「郭Sir」亦希望賽事能夠容許球迷入場︰「始終Football is nothing without fans（沒有球迷，足球甚麼都不是），尤其我諗大家都知元朗個『地獄主場』嘅威力，所以我好肯定球迷入場的話，會踢高幾班波！」