占士獲克林頓派Like

兩位昔日騎士拍檔已分道揚鑣，剛傷愈嘅艾榮重返籃網正選行列，今場攻入20分包括3個三分波，另有4位隊友得分上雙，可惜仍不敵金鑽陣容嘅湖人。就算大前鋒麥基缺陣，但「粗眉哥」安東尼戴維斯夥拍「超人」杜域侯活嘅明星級內線組合，已經合共為湖人帶來30分及23個籃板，但數到最搶鏡當然係勒邦占士，今場無論力量型爆籃抑或三分外投瓣瓣有，個人獨取27分，再加上12個籃板及10次助攻，得到今季第10次「大三元」成績。

目前「大帝」職業生涯已累積得到33,626分，僅以17分落後位列NBA得分王第3位嘅高比拜仁，預計下一場常規賽勒邦占士將刻下另一里程碑，「其實得分紀錄對我嚟講意義唔大，反而可以同NBA殿堂級球星相提並論，真係令我興奮到毛管戙。」

西岸大戰拓荒者負獨行俠

至於西岸大戰拓荒者主場對獨行俠亦鬥得精彩，拓荒者雙星瘋狂搶分，列拿特攻入47分、「甜瓜」安東尼亦交出16分及11個籃板，可惜仍以125比133不敵有7位球員得分上雙，投射命中率超過50%嘅獨行俠。