大帝「雙雙」湖人重上勝軌
勒邦占士KO火箭「雙星」！昨晨NBA火箭主場迎戰西岸榜首湖人。雖然日前湖人不敵魔術9連勝斷纜，惟「紫金兵團」未受打擊，即使火箭「雙星」占士夏登及韋斯布克合轟69分，可惜「大帝」再演單天保至尊，個人獨取31分及交出全隊最多嘅12次助攻，帶領湖人贏124比115。
由於安東尼戴維斯仲未傷愈，湖人今仗又要靠勒邦占士孭飛，上半場「大帝」刻意減少起手次數保留體力，令球隊半場以59比65些微落後。不過到咗第3節，勒邦占士帶頭急起直追，除咗自己攞分仲不停分波畀隊友，結果單節以32比17反壓火箭，之後一路領先到尾贏124比115，湖人重上勝軌之餘，仲搞到火箭今季首度錄得3連敗。
夏登失準累街坊
今場火箭輸波，取得35分嘅韋斯布克其實已交足功課，問題係占士夏登雖然有34分進帳，但當中有16分係來自罰球，其餘20次起手中得8球，三分波就9射2中，命中率完全唔合格，若果佢哋唔能夠及時改善問題，莫講話爭總冠軍，就連季後賽資格都坐唔穩囉！