黎培基︰希望球迷記住我!

今場「護級大戰」的主角,當然是轟入扳平罰球的黎培基!這位18歲中場賽後表示:「自己今年第一年踢職業都未入過波,好開心第一個入球係罰球,仲要係咁重要嘅護級大戰!呢一球無論對自己定係球隊都好重要,希望可以憑我嘅表現令到球迷認得我!」他更透露上周的「預備組聯賽」有助自己重拾「射門鞋」:「本身自己都有參與罰球練習,但係平時唔係射呢個位,上星期三喺預備組聯賽有個罰球喺差唔多嘅位置,嗰日射遠柱入咗,攞番啲感覺,所以今場都想試吓,好開心可以入到!」

盼於賀歲盃為自己正名

這記罰球,對最近獲選入「2020鼠年賀歲盃」港隊名單的「培基」來說,更是別有意義:「網上有人話今次賀歲盃嘅香港隊連B隊都不如,但係我想證明自己係靠表現入選,而唔係靠關係!」能夠在職業生涯首季入選「大港腳」,「培基」感激球會、教練團給予機會:「因為如果冇得出場,代表隊未必有名,自己喺操練都有啲懶,希望可以改到。總結頭半季,除咗第一場對傑志有啲怯場之後,整體都滿意自己表現。」至於愉園主教練鮑家耀則寄語「培基」:「開心去踢賀歲盃,逗吓利是!」圖/文:陳焌鏗