on.cc東網直播最激對決連環爆
「中銀人壽香港超級聯賽」今午好戲連環爆！頭場下午2時30分於大埔運動場和富大埔與冠忠南區合演「地區打吡3部曲」的「最終章」，雙方今個月繼聯賽首循環及「菁英盃」後再度碰頭；尾場下午5時30分在將軍澳運動場則預演「高級組銀牌」決賽戲碼，東方龍獅主場硬撼理文，兩隊力保奪標希望不容有失，必盡全力爭做贏家！（on.cc東網周六下午2時30分起直播）
連鬥冠忠南區第3回 和富大埔誓壯行色
目前排第6的和富大埔相隔一個多月再次主場出擊，連續3仗面對冠忠南區。總監兼主教練馮凱文謂：「上場『菁英盃』球隊心態、進攻好咗，製造到好多攻門，可惜埋門能力差導致入唔到波。今次返番聯賽加上主場，希望搶到分！」
「綠戰士」下周二亞冠外對吉打
和富大埔下周二出師亞冠盃外圍賽，作客馬來西亞超聯球隊吉打，兩仗之間僅隔兩天，「馮Sir」坦言：「今場波我哋有隱憂，因為踢完第二日就要飛去馬來西亞，球員恢復係一個好大嘅課題，今場一定要取平衡。」大埔同時要面對傷兵滿營的困境，中堅杜度、唐道碧、雲美亞斯及中場陸志豪均養傷中，還有前鋒金玟基身體不適。
連續兩場擊敗「綠戰士」的冠忠南區，主教練鄭兆聰（Ricky）表示：「上兩場大埔畀到好多威脅我哋，好在我哋防守夠專注，而查維斯近排腳風亦順，喺入球方面有保證。我相信今場雙方實力好接近，視乎邊個把握到機會入波。」球隊在冬季轉會窗簽入阿根廷中場文迪斯，Ricky稱：「文迪斯用波能力幾好，希望畀到唔同嘅進攻模式我哋，不過佢之前停咗一段時間，我哋都要提升佢嘅狀態。」人腳方面，巴西翼鋒迪亞高傷愈復出隨時候命，另一巴西兵、中場狄卡奧則仍需觀察，惟「子彈」夏志明就肯定缺陣。
強強對決撼理文 東方龍獅變陣追分
東方龍獅目前以6分落後榜首富力R&F，沒有多少失分餘地。對於近兩仗「菁英盃」均告失分，主教練李志堅表示，期望引入辛祖及盧卡斯能夠加強攻力的同時，亦可好好發揮輪換功效︰「球隊之前嘅把握力未足以去破陣，依家加入咗盧卡斯同辛祖，有信心做得更好。上場『菁英盃』我哋都選擇派1名外援踢正選，始終要衡量點樣輪換先至最理想。目前惟有喺之後賽事急起直追，只要確保更多球員進入狀態，球隊自然會運作得好。」儘管實力有所增強，但「堅Sir」亦不敢輕視理文︰「佢哋班外援喺進攻上幫到球隊，絕對唔易應付。」
陳曉明：下半季重新調整考心思
聯賽「3哥」理文現以3分落後榜首富力R&F，但就踢少1場，球隊上仗於「菁英盃」面對傑志，在傷病困擾下遭遇大敗，主教練陳曉明期望今仗能夠有主力重披戰袍︰「雖然對手增咗兵，但今場波希望列斯奥同尼迪利可以踢到，喺接近『Full Team』嘅情況下，加上做一啲調整，球隊可以有好表現。」
「陳Sir」表示現時最關心的事情，就是球員能否重現上月取得4連勝的氣勢︰「今場波我唔係擔心對手增兵，或者我哋有邊個會踢，反而比較擔心嘅係，球隊上場『菁英盃』唔係咁Fit，始終我哋喺12月谷得好盡，嚟緊下半季點樣再重新調整晒所有嘢，呢一樣先係我依家最大嘅憂慮。」