富迪斯爆發魔術險挫湖人
湖人9連勝斷纜！昨晨NBA常規賽，西岸「一哥」湖人主場對魔術，喺安東尼戴維斯（AD）缺陣下全場捱打，雖然去到第4節一度反超前，但魔術控衞富迪斯喺完場前1分鐘連入2球關鍵剷籃，結果湖人以118比119倒灶。
「紫金兵團」9連勝告終
因傷已連續缺陣3仗嘅AD，賽前雖獲列入觀察名單，但始終都未能為披甲，搞到湖人要用麥基鎮守籃底，可惜此子被魔術中鋒胡斯域恰到一戙都冇，雖然憑着勒邦占士及曲克多次三分球得手，由落後最多21分追到反超前1分，惟魔術21歲小將富迪斯打出代表作，交出21分、11籃板及10助攻嘅「三雙」之餘，更喺完場前包辦2記高難度剷籃，帶領魔術險勝119比118，打斷「紫金兵團」9連勝紀錄。