目標明確放膽去搏 冠忠南區搶榜首激鍊和富大埔

今午2時30分「菁英盃」續安排激戰上演,B組兩支區隊冠忠南區與和富大埔在旺角大球場正面交鋒。目前此組形勢緊湊,位列次席的冠忠南區為求出線,今仗不容有失;榜尾大埔出線機會渺茫,惟仍需一場勝仗提升士氣。兩軍命途各異,但目標一致,勢必拚盡全力,將勝利據為己有!

B組前列4隊現時僅相差1分,榜首之爭極為激烈,目前第2的冠忠南區,今仗只要不敗便能重回榜首,20歲中場陳凱柏(Paco)希望能夠踢足全場兼交出入球或助攻,協助球隊贏波,以爭取闖入決賽:「過去兩屆我哋4強都入唔到,今屆小組首名能夠直入決賽,今場波贏到嘅話,對我哋出線好有利!」談到今仗對手和富大埔,Paco透露自己曾與效力大埔的方俊業在浸大並肩作戰,他特別指出需提防此子速度。

已是第3季征戰「菁英盃」的Paco坦言今季在體能上有所進步,加上上陣時間比之前多,令自己心態上更放膽。他亦明言要透過「菁英盃」為未來鋪路:「如果你要爭取其他比賽踢正選,你對住對手嘅U22就更加唔可以輸畀佢哋!」

楊紫彬回味做「5分鐘隊長」

和富大埔於「菁英盃」分組賽表現低迷,3戰全敗在B組敬陪末席,18歲左後衞楊紫彬(Ben)盼能以勝利報答球迷:「我自己以前都係大埔球迷,同啲球迷好熟,以前同佢哋一齊嗌,依家到佢哋幫我嗌嘅時候,真係唔想辜負佢哋嘅支持!」今仗面對冠忠南區,Ben表明渴望與南區的鄭進泓較量:「我由U12同佢鬥到依家,好想睇吓大家依家水平去到邊!」

去仗對陣佳聯元朗時,Ben從原任隊長陳文輝手上接過隊長臂章,首次於職業層面成為「大埔隊長」。雖然時間只有約5分鐘,但他坦言難忘:「因為自己喺大埔住,亦都係大埔嘅青訓,戴上個章真係好有歸屬感,唔想場波咁快完!」

圖/文:陳焌鏗