2004年，我偶像陳偉豪曾經喺《我要做Model》演出，表現一鳴驚人。13年後，我也加入球圈，但唔係做Model，我要做Football Manager。
你可能會話我「FM上腦」，但其實2017年膽粗粗「Send CV」畀梁智駒時，我本來打算做市場推廣。只是當年「駒總」話我五官端正，有人中之龍相，況且真正原因係市場部已經請咗無厘頭嘅人，故安排我做管理工作。夢想退出港超後，幸得香港飛馬「文總」賞識和邀請，令我有機會踏入球圈工作第3個年頭。
轉會初時，飛馬陣中有較多資深球員，我都擔心自己適應唔到。阿媽教我朝早要同人講早晨，我都照做。後來我發現球隊上下打成一片，除咗場上「Play Hard」，場外都「Play Hard」，大家約食飯吹水唔抹嘴，讓我感到非常自在。
3季前我做「湯總」（任職夢想FC時的花名）時，經常擔心自己不懂得壓場。隨着工作經驗漸增，「劏」少了，與「豪歌」講嘢多了，人也開朗了；從前申請的港超牌照變成亞協牌了，人也淡定了。這年幾因為家人支持，我唔覺攰，當中特別係老竇同女朋友「十卜」，令我感到窩心。小時候老竇帶我睇南華，依家因為我嘅工作，佢會去睇飛馬比賽撐場；本來唔係球迷嘅女朋友，都因為我經常入場睇波，知道咩係越位，呢啲都係我繼續走落去嘅動力。
老實講，雖然呢幾年港超入場率未有太大起色，但我仍然記得當初加入球圈嘅抱負─「了解同改變香港足球，直至它重新起飛嘅一日。我會繼續走落去，希望3年之後又3年，將我嘅『FM夢』變成現實，有朝一日管理一家港超球會，為港足略盡綿力。」
香港飛馬行政主任 巫栢年