4年半後再入波百感交集
大家好，我係和富大埔足球隊嘅陳文輝，首先想講吓相隔4年半之後再次係正式比賽入面入球，當然感到非常開心，我覺得其實用百感交集嚟形容會更加貼切，因為呢個入球喺比數上睇可能係無關痛癢，但當中包含咗好多感受同經歷。
因為呢球係4年前第一次受大傷之後取得嘅入球，當初連仲有冇機會再次喺港超賽場比賽都唔能夠肯定，但依家可以再次健健康康咁喺球場上比賽仲有波入，中間經歷咗一段漫長時間嘅物理治療同復康運動，所以想藉住呢個機會去多謝由我受傷Day 1開始，到復出呢段時間裏面，喺無論大大小小事情上有幫過我嘅人，包括物理治療師、幫我做復康運動嘅體能訓練員、喺合約上幫我解決問題嘅，亦都有喺我需要幫助嘅時候提供一個機會同埋好好嘅環境，畀我可以專心做好復康再復出嘅球會，仲有喺我受傷之後仲肯相信我嘅人，小弟好衷心喺呢度多謝你哋每一位，無你哋我都唔知仲可唔可以繼續踢到波。
最後，希望喺嚟緊嘅日子，可以繼續入波，幫球隊爭取佳績，去多謝各位球迷同信任我嘅人。
專欄輪住嚟
和富大埔球員 陳文輝